மும்பை விமான நிலையத்தில் வெளிநாட்டு நாணயங்களுடன் இலங்கையைச் சேர்ந்த இருவர் கைது செய்யப்பட்டுள்ளனர்.

மும்பையில் உள்ள சத்ரபதி சிவாஜி விமான நிலையத்தில் நேற்று இரவு நடத்தப்பட்ட சோதனையில் 21 இலட்சம் ரூபாய் மதிப்பிலான வெளிநாட்டு நாணயங்கள் பறிமுதல் செய்யப்பட்டன.

அவர்கள் இவரும் குறித்த பணத் தொகையை இலங்கைக்கு கொண்டுவர முயற்சித்துள்ளதாக இந்திய செய்திகள் தெரிவிக்கின்றன.

தற்போது மும்பை விமானநிலைய சுங்க பிரிவால் அவர்கள் கைது செய்யப்பட்டு மேலதிக விசாரணைகள் முன்னெடுக்கப்பட்டுள்ளது

கொழும்பு கோட்டையில் இருந்து காலி நோக்கி பயணித்த கடுகதி ரயிலில் மோதி நபரொருவர் உயிரிழந்துள்ளார்.

நேற்று இரவு இந்த விபத்து இடம்பெற்றுள்ளதாக களுத்துதுறை வடக்கு பொலிஸார் தெரிவித்தனர்.

குறித்த நபரின் சடலம் நாகொட வைத்தியசாலையின் பிரேத அறையில் வைக்கப்பட்டுள்ளதுடன் உயிரிழந்த நபர் தொடர்பில் தகவல்கள் கிடைக்கவில்லையென தெரிவிக்கப்பட்டுள்ளது.

 
யாழிலிருந்து கொழும்பு நோக்கி பயணித்த பயணிகள் பேரூந்து மாங்குளத்தில் நேற்று (29.01.2017) இரவு 9.15 மணியளவில் பாரிய விபத்தில் சிக்கியுள்ளது.

யாழ் காங்கேசன்துறையிலிருந்து மொரட்டுவ நோக்கி சேவையிலீடுபடும் தனியார் பேரூந்து ஒன்று முல்லைத்தீவு மாங்குளம் பகுதியில் வீதியில் நின்ற எருமை மாட்டு கூட்டம் ஒன்றிமீது மோதி விபத்துக்குள்ளாகியுள்ளது. இதில் 15க்கும் மேற்பட்ட எருமை மாடுகள் பலியானதோடு 10 பேர் காயமடைந்துள்ளனர். மேலும் 20க்கும் மேற்பட்ட மாடுகள் காயமடைந்துள்ளன.

வீதியில் நின்ற மாட்டுக் கூட்டத்தை அவதானிக்காத சாரதி அதிவேகமாக சென்றதாலேயே இந்த விபத்து இடம்பெற்றுள்ளது. இதில் பேரூந்தில் பயணம் செய்த பயணிகள் சிலரும் சிறுகாயங்களுக்கு உள்ளாகியுள்ளனர்.

இதில் பலியான மற்றும் காயமடைந்த மாடுகளின் பெறுமதி 15 லட்சத்துக்கும் மேலானதாகும். இந்த விபத்து தொடர்பில் மேலதிக விசாரணைகளை மாங்குளம் பொலிஸார் மேற்கொண்டுள்ளனர்.

அண்மைய காலமாக முல்லைத்தீவு மாவட்டத்தின் பிரதான வீதிகளில் கட்டாக்காலிகளாக திரியும் கால்நடைகளால் அடிக்கடி விபத்துகள் இடம்பெறுவதோடு அதிகளவான கால்நடைகளும் அழிந்து வருகின்றன.

கால்நடைகளால் பயனை அடையும் உரிமையாளர்கள் அவற்றை உரியவகையில் கட்டி வளர்த்து பராமரித்தால் இவ்வாறு விபத்துக்கள் ஏற்பட்டு பெருமளவில் வருமானத்தை ஈட்டித்தரும் கால்நடைகள் அநியாயமாக அழிந்து போவதை தடுக்கலாம் என்பதோடு அநேகமான விபத்துக்களையும் மனித உயிரிழப்புக்களை தவிர்க்கமுடியுமென சமூக ஆர்வலர்கள் தெரிவிக்கின்றனர்.

மூன்று நாட்களுக்கு மேல் காய்ச்சல் நீடித்தால் உடன் வைத்தியரை நாடுமாறு பொதுமக்களுக்கு அறிவித்தல் விடுக்கப்பட்டுள்ளது.

நாட்டில் டெங்கு அபாயம் காணப்படுவதனால், சுகாதார அமைச்சின் தொற்று நோய் ஆய்வுப் பிரிவு இந்த அறிவுறுத்தலை விடுத்துள்ளது.

இந்த வருடத்தில் தற்போது வரையான காலப்பகுதிக்குள் 6 ஆயிரத்து 508 பேர் டெங்குநோயாளர்கள் அடையாளம் காணப்பட்டுள்ளனர்.

இவர்களில் மேல் மாகாணத்தில் 43 வீதமான டெங்கு நோயாளர்கள் இனங்காணப்பட்டுள்ளதாக தொற்று நோய் ஆய்வுப் பிரிவு தெரிவித்துள்ளது.

எனவே, டெங்கு தொற்றிலிருந்து பாதுகாப்பு பெற்றுகொள்ளுமாறும், சுற்றுச்சூழலை பாதுகாப்பாக வைத்திருக்குமாறும் மக்களுக்கு அறிவுறுத்தல் விடுக்கப்பட்டுள்ளமை குறிப்பிடத்தக்கது.

 
மன்னார் சௌத்பார் கிராமத்தில் இருந்து மீன் பிடிப்பதற்காக சென்ற தந்தை மற்றும் மகனின் சடலங்கள் இன்றைய தினம் மீட்கப்பட்டுள்ளது.

குறித்த இருவரும் நேற்றிரவு ‘குள்ளா’ என அழைக்கப்படும் படகு ஒன்றில் மீன் பிடிக்கச் சென்ற நிலையில் உயிரிழந்தவாறு இன்று காலை சடலமாக மீட்கப்பட்டுள்ளனர். குறித்த சம்பவம் தொடர்பாக தெரிய வருகையில்,

மன்னார் சௌத்பார் கிராமத்தைச் சேர்ந்த மீனவரான ஜெஸ்மன் (வயது-49) என்பவர் தனது இளைய மகனான ஜெ.ஜெக்ஸ்சன் (வயது-9) என்ற சிறுவனை அழைத்துக்கொண்டு நேற்றிரவு மீன் பிடிப்பதற்காக கடலுக்குச் சென்றுள்ளார்.

எனினும் வெகு நேரமாகியும் வீடு திரும்பாத நிலையில் தேடுதல் பணிகளை குடும்பத்தினர் ஆரம்பித்துள்ளனர்.

மேலும் இவ்விடயம் தொடர்பில் பொலிஸாருக்கு அறிவிக்கப்பட்டதைத் தொடர்ந்து, பொலிஸாரும் தேடுதல் பணிகளை தீவிரப்படுத்தியுள்ளனர். இந்நிலையில் இன்று காலை இருவரும் சடலமாக மீட்கப்பட்டுள்ளனர்.

படகு கடலில் மூழ்கியமையினாலேயே இருவரும் உயிரிழந்துள்ளதாக பொலிஸார் தெரிவிக்கின்றனர்.

இதேவேளை சடலம் மன்னார் வைத்தியசாலையில் ஒப்படைக்கப்பட்டுள்ளதுடன் மேலதிக விசாரணைகளை மேற்கொண்டு வருகின்றமையும் குறிப்பிடத்தக்கது.

மொனராகலை மஹாநாம தேசிய பாடசாலையில் உயர்தரத்தில் வணிக பிரிவில் கல்வி கற்ற மாணவி சாதனை படைத்துள்ளார்.

குறித்த மாணவி மொனராகலை மாவட்டத்தில் முதலாம் இடத்தை பெற்று கல்லூரிக்கு நற்பெயரை பெற்றுக் கொடுத்துள்ளார்.

சியம்பலாண்டுவ பிரதேச செயலகத்தின் மிகவும் வறுமையான பிரதேசமான கொட்டியாகல முகலங்யாய 10ஆம் மையில் கல் பிரதேசத்தை சேர்ந்த ரொஷானி ஜயமாலி என்ற மாணவியே திறமையை வெளிப்படுத்தியுள்ளார்.

மொனராகல நகரத்தில் இருந்து 50 கிலோமீற்றர் தூரத்தில் உள்ள பிரதேசத்தில் விவசாய குடும்பத்தில் பிறந்த அவர், சிறிய வயது முதல் கல்வி மீது அதிக திறமை கொண்டவராக காணப்பட்டுள்ளார்

தனது வெற்றி தொடர்பில் கருத்து வெளியிட்ட ரொஷானி,

நான் முதலாவது கல்வியை கொடியாகல ஆரம்ப பாடசாலையில் ஆரம்பித்தேன். 2007ஆம் ஆண்டு 5ஆம் ஆண்டு புலமை பரீட்சையில் 152 புள்ளிகளை பெற்றுக் கொண்டு புலமை பரீட்சையில் சித்தியடைந்து, மொனராகல மஹாநாம தேசிய பாடசலையில் இணைந்தேன்.

அங்கு கல்வியை சிறப்பாக மேற்கொண்டு சாதாரண தரத்தில் 7 ஏ சித்திகள் மற்றும் 2 சீ சித்திகளை பெற்றுக் கொண்டேன்.

உயர்தர கல்வியை சிறப்பாக மேற்கொண்டமையினால் 3 ஏ சித்திகளை பெற்றுக் கொள்ள முடிந்துள்ளது. பாடசாலையில் எனக்கு கற்பித்த அனைத்து ஆசிரியர்களும் என்னை சரியான பாதையில் செல்ல வழி நடத்தினர்.

கொடியாகல வித்தியாலயத்தின் 60 வருட வரலாற்றில் சிறப்பான சித்தியை பெற்ற முதல் மாணவி இவராகும். அவருக்கு இரண்டு சகோதரிகள் உள்ள நிலையில் அவர் மாத்திரமே உயர்தரத்தில் சிறப்பான சித்திகளை பெற்றுக் கொண்டுள்ளார்.

சமூர்த்தி உதவி பெற்று வாழும் குடும்பமாக ரொஷானியின் குடும்பம் தற்போது மண் வீடு ஒன்றிலேயே வாழ்ந்து வருகிறார். வறுமை அவரது கல்வி பயணத்தின் வெற்றிக் தடையாக காணப்படவில்லை.

விவசாய நடவடிக்கையில் வாழும் அவரது பெற்றோர் முடிந்தளவு அவரது கல்வி நடவடிக்கைகளுக்கு உதவியுள்ளனர். அதற்கமைய அவர் சிறப்பான சித்தியை பெற்றுள்ளார் என தெரிவிக்கப்படுகின்றது.

முகநூல் ஊடாக அறிமுகமான இளைஞனுடன் காதல் தொடர்புகளை ஏற்படுத்திக்கொண்டு அந்த தொடர்புகளால் யுவதி ஒருவர் பாலியல் துஷ்பிரயோகத்திற்கு உள்ளாகியுள்ளார்.

குருணாகல் – சந்தலங்காவ என்ற பிரதேசத்தை சேர்ந்த 19 வயதான யுவதியே இவ்வாறு பாதிக்கப்பட்டுள்ளார்.

இவர் குருணாகல் பிரதேசத்தை சேர்ந்த இளைஞனுடன் முகநூலூடாக நண்பர்களாகி பின்னர் காதல் வயப்பட்டுள்ளனர்.

முகநூலில் அறிமுகமான இவர்கள் இருவரும் பல முறை சந்தித்துள்ளனர்.

இதேவேளை இளைஞனினால் குறித்த யுவதி பாலியல் துஷ்பிரயோகத்திற்கு ஆளாகியுள்ளார்.

மேலும் இளைஞனிடமிருந்து ஒதுங்கி செல்ல நினைத்த யுவதிக்கு தொடர்ந்தும் அச்சுறுத்தல் விடுத்து வந்துள்ளதுடன், தன்னுடன் வறுமாறும் அழைத்துள்ளார்.

இவ்விடயம் யுவதியின் வீட்டாருக்கு தெரியவரவே குறித்த இளைஞனை கடுமையாக எச்சரித்து அனுப்பி வைத்துள்ளனர்.

இதேவேளை குறித்த இளைஞன் எற்கனவே திருமணமானவர் எனவும் கூறப்படுகின்றது.

நன்மையான விடயங்களுக்கு பயன்படுத்த வேண்டிய முகப்புத்தகத்தினை இன்றைய இளம் சமுதாயத்தினர் அதிகமாக தீமையான விடயங்களுக்கே பயன்படுத்தி வருகின்றனர்.

மேலும் இதன் மூலம் பெண்கள் எடுக்கும் தவறான நடவடிக்கைகள் அவர்களின் வாழ்க்கையையே சீரழித்து விடுகின்றது.

எனவே இனிவரும் நாட்களில் பெண்கள் தமது பாதுகாப்பு தொடர்பில் அதிக கவனம் செலுத்துமாறும் கேட்டுக்கொள்ளப்படுகின்றனர்.

நாட்டின் நிலவி வரும் மழை மற்றும் கடும் காற்றுடன் கூடிய மூன்று மரணங்கள் சம்பவித்துள்ளன. நீரில் மூழ்குதல் மற்றும் பலத்த காற்று காரணமாக நேற்று வரையில் மூன்று மரணங்கள் சம்பவத்துள்ளன.

மட்டக்களப்பு மன்முனை பிரதேசத்தில் நீரில் மூழ்கி இரண்டு பேர் கொல்லப்பட்டுள்ளதுடன், யாழ்ப்பாணம் நெடுந்தீவு பகுதியில் மரமொன்று முறிந்து வீழ்ந்து நபர் ஒருவர் கொல்லப்பட்டுள்ளதாக அனர்த்த முகாமைத்துவ நிறுவனம் தெரிவித்துள்ளது.

கடும் மழை காரணமாக ஒன்பது மாகாணங்களில் சுமார் எழுபத்து ஒரு லட்சம் மக்கள் பாதிப்புக்களை எதிர்நோக்கியுள்ளதாக நிறுவனம் வெளியிட்டுள்ள அறிக்கையில் குறிப்பிடப்பட்டுள்ளது.

வடக்கு, கிழக்கு, மேல், தென், வடமத்திய, மற்றும் வடமேல் மாகாணங்கள் அதிகளவு பாதிப்புக்களை எதிர்நோக்கியுள்ளதாகத் தெரிவிக்கப்படுகிறது.

கடுமையான காற்றினால் நான்கு வீடுகள் முற்றாக அழிவடைந்துள்ளதுடன், 106 வீடுகள் பகுதியளவில் சேதமடைந்துள்ளன.

மட்டக்களப்பில் நேற்றுடன் நிறைவடைந்த 72 மணித்தியாலங்களில் 236 மில்லி மீற்றர் மழை பெய்துள்ளது. 236 மில்லி மீற்றர் மழை பெய்துள்ளது.

நட்டை அண்டிய கடற்பரப்பிலும் காற்றுடன் கூடிய மழை பெய்து வருவதாக வளிமண்டலவியல் திணைக்களம் தெரிவித்துள்ளது.

இடி மின்னல் தாக்குதல் குறித்து மக்கள் அவதானத்துடன் இருக்க வேண்டுமென கோரப்பட்டுள்ளது.

இன்றைய தினமும் நாட்டின் சில பகுதிகளில் கடுமையான மழை பெய்யக் கூடும் என தெரிவிக்கப்படுகிறது.

அண்மைய நாட்களாக நாட்டில் கடுமையான வரட்சி நிலைமை நீடித்து வந்ததுடன் மழை வேண்டி பல்வேறு மத வழிபாட்டு நிகழ்வுகள் நடத்தப்பட்டிருந்தமை குறிப்பிடத்தக்கது.